Mesfushori i Real Madridit, Mateo Kovacic edhe një herë vjen nën radarin e Juventusit. Klubi i Serie A u përpoq të nënshkruante me yllin kroat në merkaton e transferimit të verës së kaluar, duke ofruar 75 milionë euro për ta marrë atë nga duart e Real Madridit. Megjithatë, oferta u refuzua nga “Los Blancos”, një vendim i mbështetur nga ish-trajneri Zinedine Zidane. Pas largimit të ish-mesfushorit francez nga klubi, e ardhmja e Kovacic është përsëri në ajër dhe sipas prestigjozes madrilene “AS”, një lëvizje e menjëhershme larg nga “Los Blancos” është skenari më i mundshëm, veçanërisht nëse ai do të mbetet një lojtar i pjesshëm. Kovacic e sheh veten si një lojtar të denjë për të qenë pjesë e formacionit bazë, por sezonin e kaluar në ndeshjet e mëdha të Real Madridit, ai filloi vetëm në “El Clásico”, ku nuk arriti të bindë, në ndeshjen e kthimit të Ligës së Kampionëve 1/16 kundër Paris SG për shkak të dëmtimeve të Modric dhe Kroos, dhe pjesa e dytë e gjysmëfinales kundër Bayern Munchen në një ‘dredhi’ taktike nga Zidane.
Gjithsesi, para se të marrë një vendim përfundimtar ai është i interesuar të shohë se kush do të jetë trajneri i ri i klubit dhe më pas roli që do të kishte në skuadër. Në rast se i ofrohet një vend në formacion do të ishte tepër e vështirë që mesfushori kroat të largohet nga Real Madridi, ndërsa ka fituar dy trofe të Champions League gjatë dy viteve me “Los Blancos”. Ndërsa kjo situatë pret përfundimin e saj, Juventusi mbetet në gatishmëri dhe ka kontaktuar tashmë lojtarin duke i treguar ambiciet që ka, por jo klubin. 23-vjeçari është një nga lojtarët më të kërkuar në merkato, ndërsa në drejtim të tij interes kanë shfaqur disa klube të mëdha si Manchester City, Bayern Munchen, si dhe Interi.
