Për momentin ndihet komod në drejtimin e Manchester Cityt, por e ardhmja për Pep Guardiolës mund të jetë në stolin e ndonjë kombëtareje. Këtë fakt e pohon vetë tekniku katalanas, i cili në një intervistë të dhënë flet për planet që ai ka.
Tekniku u pyet nëse një ditë do t’i pëlqente të drejtonte një kombëtare dhe në përgjigjen e tij, Pep u tregua shumë i qartë,teksa u shpreh se ideja e të qenit pjesë e një Botërori ose Europiani është një variant mëse i mundshëm në një të ardhme jo edhe aq të largët.
Ndër të tjera, 47-vjeçari deklaroi se për momentin fokusi i tij është vetëm Manchester City, por nëse i vjen ndonjë ofertë do ta merrte në konsideratë. Nën drejtimin e tij, City i këtij sezoni e mbylli kampionatin me një rekord absolut prej 100 pikësh të grumbulluara.
Për Guardiolën, në 11 vite si trajner, numri i trofeve të fituar ka shkuar në 24, teksa në përfundim të kampionatit, drejtuesit e klubit anglez vendosën t’ia zgjasnin kontratën katalanasit deri në vitin 2021 dhe me një pagë vjetore që kap shumën e 20 milionë eurove.
