Merkato në dalje e Skënderbeut ka qenë gjithmonë e suksesshme dhe e tillë mund të jetë dhe këtë verë, me James Adeniyin që mund të jetë futbollisti i radhës te korçarët, që mund të përfundojë jashtë vendit. Në zyrat e klubit kampion ka mbërritur një ofertë konkrete për sulmuesin, me skuadrën azere të Qabalas që ka ofruar 120 mijë dollarë për blerjen e kartonit të tij.
Një shumë e konsiderueshme për një lojtar të rëndësishëm, por përgjigja përfundimtare e Skënderbeut do të vijë vetëm pas një vendimi të Gjykatës së Arbitrazhit Sportiv për të parë nëse korçarët do të luajnë në Uefa Champions League ose jo.
Nigeriani 25-vjeçar ishte i përfolur për një transferim jashtë Superiores dhe në merkaton e janarit, por në atë periudhe klubi vendosi ta mbante në skuadër ndërkohë që për momentin Skënderbeu e ka marrë në konsideratë si ofertë por do të vendosë në varësi dhe të pjesëmarrjes ose jo në kompeticionet europiane. James në sezonin e fundit ishte një prej protagonistëve kryesorë në fitimin e titullit kampion, teksa kontribuoi me 10 gola të shënuar në Superiore.
