Sipas raportimeve të ‘Calciomercato.com’, André Silva, qendërsulmuesi portugez i datëlindjes 1995, i bashkuar me Milan vetëm një vit më parë, mësohet të ketë kërkuar nga drejtuesit e klubit që të marrin në konsideratë çdo ofertë që do të mbërrijë në selinë kuqezi në adresën e tij. Kështu Andre Silva ka kërkuar largimin e tij nga Milan.
Motivacioni?
Është e qartë, sulmuesi realizoi 10 gola sezonin e fundit me Milan, prej të cilave plot 8 në Europa League, çka dëshmon se nuk është ambientuar mirë në kampionatin italian të Seria A. Por, mësohet gjithashtu se ai është ankuar për mungesën e vëmendjes dhe përqendrimit të stafit teknik në marrëdhënie me atë.
I blerë nga Porto në verën e vitit 2017 për shumën e 38 milionë euro përfshirë dhe bonuse, André Silva zhvilloi në total gjatë sezonit 2017-2018, 40 ndeshje mes Serie A (24), Europa League (14) dhe Kupa e Italisë (2), për një total të vetëm 1.965 minutave në fushën e lojës. Madje, në kampionat mezi numërohen vetëm 924 minuta të luajtura nga nxënësi i Cristiano Ronaldo, që do të marrë pjesë në Botërorin ‘Rusi 2018’. Të interesuar për André Silva, kanë qenë prej kohësh Monaco, Wolverhampton dhe Huddersfield.
