Marcus Rashford, ka siguruar tifozët e Anglisë se nuk ka “asgjë për t’u shqetësuar pas lëndimit të lehtë që pësoi gjatë seancës stërvitore me ekipin. Sulmuesi i Manchester United, frikësoi trajnerin Southgate pas një lëndimi që pësoi në gju para se të fluturonin drejt Rusisë për Botërorin “Rusi 2018”. Por, duket që tashmë ka kaluar dhe 20-vjeçari është në formë për t’i shërbyer skuadrës në ndeshjet e Kupës së Botës. Ylli i “Djajve të kuq” do të jetë në dispozicion të teknikut të “Tre Luanëve” për ndeshjen e parë që do të luajnë kundër Tunizisë, ditën e hënë.
Vetë lojtari përmes një postimi të bërë në rrjetin social “Twitter”, ka qetësuar tifozët, të cilët ishin shqetësuar për gjendjen e tij. Lojtari i ka siguruar ata që gjithçka është në rregull ndërsa i ka falënderuar për mesazhet që i kanë dërguar.
“Faleminderit për mesazhet që më keni dërguar. Ishte vetëm një lëndim i vogël, por asgjë për t’u shqetësuar”- ka shkruar sulmuesi bashkangjitur me emoji dhe tag-un ‘Tre Luanët”.
Southgate është i sigurt dhe ndihet i lehtësuar nga ky lajm, pasi Rashford është një nga lojtarët që ka spikatur me paraqitjen e tij në fitoren 2-0 kundër Kosta Rkës, ku shënoi një gol fantastik. Ndaj, forma e tij është tejet e rëndësishme për këtë Botëror, ku Anglia synon që të kryesojë grupin dhe të prekë finalen.
Mbase, Rashford nuk do të nisë titullar në sfidën ndaj Tunizisë, edhe pse është kaq i domosdoshëm me shpejtësinë dhe finesën e tij në fushën e blertë. Megjithatë trajneri ka në dispozicion shokët e tij, Jesse Lingard dhe Rahem Sterling, që ka gjasa të mbështesin sulmin e udhëhequr nga Harry Kane.
Anglia ndodhet në Grupin G, me Tunizinë, Panamanë dhe Belgjikën.