Klubi i Skënderbeut njoftoi se Komisioni i Apelit në UEFA ka lënë në fuqi dënimin me 2 vite pezullim të mbrojtësit Bajram Jashanica, i cili përdori substancave të ndaluara.
Bardhekuqtë sqaruan se ata nuk janë të kënaqur me vendimin dhe se do ta apelojnë atë menjëherë në CAS. Për Skënderbeun, lojtari ka mbështetjen e tyre dhe se ata nuk e konsiderojnë si fajtor.
Deklarata
Komisioni i Apelit i UEFA-s vendosi lënien në fuqi të masës disiplinore “pezullim nga aktiviteti” për një periudhë 2-vjeçare për lojtarin e KF Skënderbeut, Bajram Jashanica.Pavaresisht argumenteve dhe dëshmive të dhëna në seancë gjyqesorë nga ana e lojtarit dhe personave të tjerë të lidhur me çështjen, organi juridik vendosi mospranimin e kërkesës të paraqitur nga Bajram Jashanica për uljen e sanksionit.
Bëjmë me dije se aktualisht, palët janë në pritje për disponimin nga ana e Komisionit të Apelit të UEFA-s të vendimit integral, i cili do të ankimohet në CAS. KF Skënderbeu i ka ofruar lojtarit të gjithë mbështetjen e mundshme gjatë kësaj periudhe të vështirë për të dhe beson se masa disiplinore është disproporcionale me rrethanat e ngjarjes dhe me shkallën e përgjegjësisë të Bajram Jashanica. Për këtë arsye, në çdo formë dhe me të gjitha mjetet në dispozicion, do të kërkojmë vendosjen e një mase disiplinore më të ulët, për garantimin e vijueshmërisë së karrierës të lojtarit tonë.
