Austria në të ardhmen e Dejvi Bregut. Praktikisht gjithçka duket e mbyllur, edhe pse emri i skuadrës mbetet ende sekret. Vlonjati, që në dy vitet e fundit ka qenë një prej yjeve më të mëdhenj të Kategorisë Superiore me Luftëtarin pritet ta vazhdojë karrierën në Bundesligën austriake.
Kjo pavarësisht asaj që ndodh me fatin e Skënderbeut, klubit që prej janarit 2018 ka blerë kartonin e 22-vjeçarit. Gjithçka duket e paracaktuar në karrierën e Bregut, që ka treguar në fushë se është gati për një aventurë të madhe larg Shqipërisë.
Dilema e vetme lidhet me kupat e Europës. Nëse korçarët do të fitojnë betejën ligjore me UEFA-n në CAS dhe fitojnë të drejtën të luajnë në Champions, sulmuesi do të jetë pjesë e skuadrës së Ilir Dajës të paktën për aventurën ndërkombëtare. Më pas, menjëherë Bregu do të shitet.
Skenarin tjetër, ai sipas të cilit korçarët rrezikojnë të mos luajnë në Europë dhe që përjashtimi 10 vjeçar të mbetet në fuqi, vetëm sa do të përshpejtonte transferimin e talentit vlonjat. Pa kupat e Europës, ai do ti bashkohej menjëherë skuadrës së re. Sido që të ndodhë, e ardhmja e futbollistit është e paracaktuar, me Dejvi Bregun që do të provojë të mahnisë edhe në Austri.
