Dje ka marrë fund çështja e trajnerit te Tirana, pasi palët kanë rënë dakord për të vazhduar marrëveshjen mes tyre, duke rinovuar kontratën e trajnerit Ze Maria edhe për dy vite, saktësisht deri në vitin 2020.
Edhe pse ishte një konfirmim që pritej të ndodhte, ndoshta kushtet e caktuara nga trajneri për drejtuesit apo probleme të tjera brenda klubit kanë bërë një mbyllja e marrëveshjes të vonohej disa ditë.
Menjëherë pasi Ze Maria i ka dhënë “OK” presidentit, Tefik Halili, zbulohen dhe kushtet e kontratës dhe paga që do marrë trekniku brazilian në këto dy vite. Paga që do përfitojë tekniku është 7 mijë euro në muaj për dy vite, ndërsa në total i gjithë stafi do marrë një shumë prej 12 mijë eurosh në muaj.
Kusht i Ze Marias ka qenë dhe afrimi i 7-8 lojtarëve të rinj dhe garancia financiare për sezonin e ri, pasi vetëm në këtë mënyrë bardheblutë do të kenë mundësinë të tregojnë vlerat në Superligë.