Ndonëse prej ditësh përflitej si një përforcim i mundshëm i Interit, Braziliano Malcom ka përfunduar në një tjetër pjesë të Italisë, në kryeqytet. Sulmuesi i Bordosë është bërë lojtari më i ri i Romës, që ka çuar në 11 numrin e futbollistëve të blerë në këtë merkato vere, pavarësisht largimeve të Nainggolan dhe Alisson.
Verdhekuqtë kanë paguar 35 milionë euro për kartonin e brazilianit, plus 2.5 të tjera në formë bonusi, ndërsa lojtari do të nënshkruajë një kontratë 4-vjeçare me 2.5 milionë euro në sezon.
62.5 milionë eurot e arkëtuara menjëherë nga shitja e portierit Alisson te Liverpooli, kanë bërë që Roma të ketë buxhet të mjaftueshëm për të përballuar shpenzime të rëndësishme.
E veçanta e merkatos së Monchit është se ka afruar futbollistë që janë të moshës nën 25 vjeç, duke rinovuar ndjeshëm skuadrën dhe rritur rivalitetin në ekip.