Erik Kantona thumbon sërish sulmuesin e Brazilit, Nejmar. Në një video të publikuar në rrjetet sociale, ai thotë se “O Ney” është një aktor i madh dhe simulon shumë në fushën e lojës. Ai përdor një valixhe të verdhë me rrota për të bërë krahasimin me lojtarin. “Kam blerë një valixhe të verdhë dhe do ta quaj Nejmar.
Jo vetëm prej ngjyrës, por edhe prej faktit që rrotullohet lehtësisht për orë të tëra”, thotë Kantona dhe rrotullon valixhen. Më tej ai shton se sulmuesi 26-vjeçar është shumë i mirë si lojtar, por e ekzagjeron me simulimet. “Nejmar është lojtar i madh dhe i shkëlqyer, por nuk duhet të rrotullohet kaq shumë kur i ndërhyjnë të tjerët. Duhet të bëjë kujdes nëse dikush i ndërhyn në shpatullën e djathtë, sepse e vë dorën në pjesën e majtë të fytyrës dhe thotë se u dëmtua aty”, thotë Kantona.
