Shkëndija e Tetovës merr një lajm të keq vetëm një ditë pas fitores minimale në Shkup me kampionen e Moldavisë, Sheriff Tiraspol. Ekzaminimet e fundit mjekësore kanë konfirmuar atë që i frikësoheshin më shumë në kampin kuqezi, mungesën për një kohë të gjatë të një lojtari të rëndësishëm të formacionit të Qatip Osmanit. Në njoftimin e fundit të dhënë nga klubi tetovar shkruhet:
“Shkëndija do të jetë pa Marjan Radeskin për një periudhë më të gjatë. Dëmtimi i pësuar në Uells në takimin e kthimit të xhiros së parë eliminatore të Champions League kundër The New Saints rezulton të jetë serioz. Testimet e detajuara dhe rezonanca magnetike tregojnë këputje të ligamenteve të përparme të kryqëzuara të gjurit të këmbës së djathtë. Kjo nënkupton ndërhyrje kirurgjike dhe pauzë më të gjatë, e nevojshme për rehabilitim. Ndërhyrja do të kryhet ditëve në vijim, ndërsa menjëherë do të startohet me procesin e rikuperimit.”