Rafinha Alcántara tregon se e ardhmja e të vëllait, Thiago, është shumë e ndryshme nga e tija. Në konferencën për shtyp të organizuar për lojtarin e kombëtares braziliane ai ka shprehur dëshirën për të luajtur te Inter-i, ndërsa ka pranuar se do të donte që të shihte sërish te Barcelona të vëllain e tij që aktualisht është pjesë e Bayern Mynihut.
“Nëse do të dija të ardhmen time, iu premtoj se do ua kisha treguar. Shumë gjëra kanë dalë dhe kjo është arsyeja pse unë i lejoj njerëzit të flasin për mua. Kam shpenzuar shumë muaj të mirë tek Inter-i dhe do të doja që të vazhdoja aty, por tani jam një lojtar i Barcelona-s”, tha Rafinha nga Shtetet e Bashkuara të Amerikës, aty ku Barça po kryen një turne.
Rafinha, i cili nga ana tjetër, ka rrëfyer se do të dëshironte të shihte të vëllain sërish në “Camp Nou”: “Do të doja që ta shihja atë sërish te Barça, sepse mendoj se ai përshtatet në mënyrë perfekte me këtë ekip”, tha i vogli i Alcantara-ve.