Pas golit magjik ndaj Argjentiës në 1/8-at e Kupës së Botës, interesi për Benjamin Pavard është intensifikuar akoma më shumë.
Mbrojtësi i djathtë i Stuttgart po tërheq vëmendjen e elitës europiane, por klubi gjerman ka ndërmend ta mbajë edhe një vit tjetër, këtë e ka theksuar drejtori sportiv Michael Reschke.
Pavard shënoi golin e barazimit, një gol ëndrrash nga jashtë zone, teksa Franca mposhti Argjentinën 4-3.
“Pavard ka tërhequr vëmendjen e klubeve të mëdha që para se të fillonte botërori,” shprehet Reschke.
“Por ne jemi të qetë, lojtari ka një kontratë me ne e cila skadon më 2021. Ne duam ta mbajmë lojtarin. Por të shohim se çfarë do të na sjellin javët dhe muajt e ardhshëm.
“Për momentin nuk do e shesim as për 50 mln euro, do të mundohemi ta bindim të qëndrojë te ne edhe për një vit tjetër.”
