Thuhet se një fotografi, në shumë raste, vlen sa një mijë fjalë dhe kjo padyshim që ka ndodhur në mbrëmjen e së martës në Moskë, në momentin e ekzekutimit të 11-metërshave në fund të sfidës Angli-Kolumbi.
Në momentin që portieri Jordan Pickford priti penalltinë e ekzekutuar nga Carlos Bacca, të gjithë futbollistët e Anglisë festuan dukshëm, me përjashtim të Eric Dier, sepse vetëm pak sekonda më vonë futbollisti i Tottenham do të kishte përgjegjësinë më të madhe, të shënonte gol, për t’i dhënë kualifikimin “luanëve”.
Teksa shokët e tij u lumturuan për mrekullinë e Pickford, Dier ishte i vetmi që nuk buzëqeshi, por mbeti maksimalisht i përqendruar, derisa shkoi te pika e bardhë, ku shënoi duke i dhënë Anglisë biletën për në çerekfinale.
Kjo ishte hera e parë në historinë e Kupës së Botës, që Anglia u kualifikua me penallti.