Në një pozitë të tillë ku ndodhet Vllaznia planet për shpenzime të mëdha nuk mund të mendohen. Këshilli i Bashkisë Shkodër pritet të konfirmojë për rinovimin e kuqebluve 150 milionë lekë të vjetra.
Kjo shumë do të shërbejë për të nisur blerjet e para në këtë merkato si dhe shlyerjen e një page të prapambetur të futbollistëve dhe stafit teknik.
Në raport me tarifat e pagesave të futbollistëve, Bashkia e Shkodrës heq dorë nga shumat e larta duke parë që me shpenzime të mëdha sezonin e kaluar shkodranët nuk garantuan dot mbijetesën në Superligë. Pra planifikimi ekonomik për riorganizimin e Vllaznisë do të jetë shumë i kursyer dhe i kujdesshëm.