Orët kalojnë dhe Cristiano Ronaldo shkon gjithnjë e më pranë transferimit te Juventusi. Mëngjesin e sotëm u mësua se Perez kishte thërritur në një takim agjentin e portugezit, Jorge Mendes, për të qartësuar pozitat dhe për të folur për çmimin e kartonit të lojtarit.
Gjithashtu, mediat italiane raportuan se edhe në Torino kishte mbërritur tashmë Massimiliano Allegri, që do takohet me Agnellin, për të folur për mundësinë e transferimit dhe modifikimet e nevojshme në skuadër, për ta përshtatur atë ndaj Ronaldos.
Nga ana tjetër, Giuseppe Marotta dhe Fabio Parattici, dy drejtues të lartë të Juventusit, do të nisen mbrëmjen e sotme për në Madrid me avion privat, për të diskutuar detajet e fundit të transferimit.
Duket se synimi i bardhezinjve, por jo vetëm, është që Ronaldo të prezantohet te Juventusi ditën e shtunë, që përkon me datën 7 të muajit të 7 (korrikut), ashtu si numri që portugezi mban mbi shpinë.
Ndërkohë si për “t’i hedhur benzinë zjarrit”, Luciano Moggi ka deklaruar për mediat italiane se marrëveshja për transferimin e Ronaldos te Juventusi është arritur prej kohësh dhe se portugezi ka kryer edhe vizitat mjekësore në Mynih, për të shmangur rrjedhjen e informacionit.
