Trajneri Pep Guardiola u shpreh se të gjithë te skuadra e Manchester City duan që mesfushori Raheem Sterling të qëndrojë sa më gjatë me “qytetarët” dhe të nënshkruajë një kontratë të re me kampionët e Anglisë. Sterling, që erdhi tek City nga Liverpool në vitin 2015, ende nuk ka firmosur rinovimin e kontratës dhe deri sa kjo të ndodhë e ardhmja e lojtarit është ende e paqartë. Megjithatë, 23-vjeçari, që vjet realizoi 18 gola në Premier, ka ende edhe dy vite kontratë me City dhe ka kohë për të gjetur gjuhën e përbashkët.
“Raheem dhe agjenti i tij e dinë mendimin tim, madje edhe drejtuesit tanë kanë biseduar me të. Që ditën e parë që kam ardhur këtu e kam thënë këtë gjë, por marrëveshjet janë marrëveshje dhe të tjerët vendosin për këtë gjë. Unë nuk e di se çfarë do të ndodhë, por personalisht ju garantoj me 100% që unë dëshiroj që ai të qëndrojë këtu sa më gjatë”, tha trajneri Pep Guardiola para finales së Community Shield që ekipi i Manchester City do të luajë ndaj Chelsea.
