Skuadra e Tottenham është mes kryesueseve të Premier League, duke udhëhequr renditjen me 9 pikë të plota pas 3 javëve të para. Fitorja e javës së fundit ndaj Manchester United, në “Old Trafford” ka rritur ndjeshëm kuotat e skuadrës londineze, ndërkohë që sipas trajnerit Mauricio Pochettino rivalët shpesh e nënvlerësojnë ekipin e tij. “Kush e bën këtë gjë, gabon, pasi Tottenham ka një ekip që mund të duelojë për titull dhe ta fitojë atë”, u shpreh sot trajneri argjentinas, para ndeshjeve të javës së 4-t në Premier.
“Nuk më pëlqen fakti që nuk na konsiderojnë pretendentë, kam mbetur paksa i zhgënjyer, por fusha do të tregojë se kush jemi. Jam i sigurt se do të arrijmë të bindim edhe skeptikët për forcën tonë. Janë luajtur vetëm 3 ndeshje, ndaj duhet ta ruajmë këtë ritëm për 10 muaj, deri në maj. Duke nisur nga ndeshja e radhës, ajo ndaj Watford, për të konfirmuar se fitorja ndaj Manchester United nuk ishte rastësi, por punë e një ekip të kolauduar, që luan prej një viti në këto ritme”, deklaroi Pochettino, që do të luajë ditën e diel.
