Pas paraqitjes së tmerrshme të Argjentinës në Kupën e Botës në Rusi, Lionel Messi ka marrë kohë për të vendosur mbi të ardhmen e tij me Albiceleste teksa është përballë një dileme të madhe. Messi kërkon kohë për të vendosur dhe askush nuk e di akoma se çfarë do të bëjë ai, as vetë sulmuesi.
Futbolli argjentinas është në një gjendje jo-normale për momentin me Sampaoli që është shkarkuar nga detyra e tij pas turneut. Scaloni është emëruar si trajner i përkohshëm derisa të gjehet një trajner i denjë. Messi nuk do të grumbullohet për miqësoret e ardhshme, gjithsesi nuk ka asnjë të re, por ai mund të vendosë t’i japë fund aventurës së tij me përfaqësuesen.
31-vjeçari nuk do të nxitohet të marrë një vendim, ashtu siç bëri më 2016, ai do të tregohet i gjakftohtë këtë herë për të mos përsëritur të njëjtin gabim.
Është një vendim personal dhe shumë i rëndësishëm, pasi do të hiqte dorë nga shansi për të fituar një trofe madhor me kombëtaren, diçka që i mungon në kabinetin e trofeve.
Në verën e 2019, Copa America do të luhet në Brazil, dhe Messi do të marrë vendimin e tij përpara vitit të ri.
