Pas shiut që ka rënë një ditë më parë, që ka sjellë edhe ndërprerjen në mes të disa ndeshjeve në turneun Masters të Sinsinatit në tenis, gjithçka i është rikthyer normalitet dhe kanë vijuar takimet e radhës. Djokovic ka mbyllur sot sfidën e nisur dje ndaj bullgarit Grigor Dimitrov, duke fituar 2-1 (2-6, 6-3, 6-4). Shiu duket se ndihmoi serbin, që pasi e nisi keq ndeshjen arriti t’i përmbysë shifrat, duke avancuar më tej. Një fitore të lehtë arriti edhe Roger Federer, që mundi 2-0 austriakun Leonardo Mayer (6-1, 7-6), në një takim ku vetëm seti i dytë dhuroi rivalitet.
Te femrat avancon më tej numri 1 në botë, tenistja rumune Simona Halep, që mposhti 2-0 (7-5, 6-4) australianen Ashleigt Barty, në një ndeshje me rivalitet dhe emocione në shumicën e kohës. Një biletë për më tej arriti të sigurojë edhe tenistja ukrainase Elina Svitolina, që mundi 2-0 (6-4, 6-4) amerikanen Amanda Anisimova, ndërsa tenistja holandeze Kiki Bertens mposhti 2-1 estonezen Anett Kontaveit. Turneu Masters i Sinsinatit është turneu i fundit në prag të grand slam të US Open, që do të nisë në fund të gushtit në Nju Jork.