Pas performancës pozitive te Benevento, Berat Gjimshiti u rikthye te Atalanta, ku ka fituar edhe vendin e titullari. Largimi i Kaldarës drejt Milanit, i hapi rrugën shqiptarit, i cili në 2 ndeshjet e fundit është aktivizuar si titullar. Në një prononcim për mediat italiane Gjimshiti ka komentuar zërat e markatos si dhe ka theksuar objektivat për sezonin e ri.
“Ishin mundësitë për të ikur, por më pas me menaxherin tim dhe drejtuesit i vlerësuam gjërat me qetësi dhe vendosa të qëndroj tek Atalanta. Në dy vitet e huazimit jam rritur shumë, por ky vit mund të jetë vendimtari për mua. Kjo pasi me z. Gasperini mund të bëj atë kërcimin e madh në cilësi.
Këtu ka mbrojtës që kanë bërë mirë për dy vite dhe unë po përiqem të mësoj sa më shumë të jetë e mundur. Jam i kënaqur me atë që kam bërë deri më tani, por kam qëndruar në ekip sepse dua të tregoj vlerat e mira. Është një moment i mirë për ekipin dhe duhet të vazhdojmë kështu. Duam të shkojmë në grupet e Europa League. Po punojmë shumë dhe ndeshje si këto me Frozinonen, ku fitojmë duke krijuar shumë mundësi shënimi, na ndihmojnë të gjejmë besimin e duhur”, u shpreh Gjimshiti.
