Laçi ka zgjedhur trajnerin e ri për sezonin e ardhshëm në Superligë. Kurbinasit do të kenë në bankinën e tyre një emër të njohur të trajningut shqiptar, si Artan Mërgjyshi. Presidenti i Laçit Pashk Laska dhe tekniku tiranas kanë gjetur dakordësinë dhe pritet që Mërgjyshi të marrë drejtimin e ekipit që nga dita e mërkurë.
Laçi pas largimit të Mezanit në fund të sezonit për ndeshjet europiane kishte në stol, Besnik Prengën, i cili në fund të katër ndeshjeve u rikthye në Kroaci. Për Artan Mërgjyshin, Laçi do të jetë klubi i disatë që drejton në karrierë, pasi më herët ka qenë në stolin e Apolonisë, Dinamos, Besës e disa skuadrave të tjera në kategorinë e Parë.
Artan Mërgjyshi përveçse ka drejtuar skuadra të mëdha, njihet edhe si një teknik që ka punuar shumë me ekipet e moshave. Besohet se kjo ka qenë pikërisht arsyeja që e ka shtyrë presidentin e Laçit, për të firmosur me Mërgjyshin.
Sakaq Mërgjyshi e ka konfirmuar firmën me Laçin. “Po, është e vërtetë. Sapo konkluduam detajet e fundit me presidentin Pashk Laska. Shumicën e futbollistëve i njoh. Do ta nisim me Superkupën, ku duam të sjellim një tjetër trofe në Laç. Gjatë këtyre dy javëve deri në startin e ri të sezonit do të bëjmë edhe afrime në skuadër, aty ku skuadra ka më shumë nevojë. Laçi do të vijojë ta thotë fjalën e vet, sin ë kampionat, ashtu dhe në Kupë” – është shprehur Artan Mërgjyshi.
