Një transferim i bujshëm vjen nga merkato në këto orë të fundit të saj. Burime për gazetën nga klubi durrsak, konfirmojnë se Gerhard Progni, ka gjetur marrëveshjen me klubin e Teutës, dhe do të nisë menjëherë nga puna me durrsakët.
Dy klubet kanë gjetur gjuhën e përbashkët dhe lojtari tropojan është bashkuar me skuadrën e Bledi Shkëmbit, siç bëjnë me dije të njëjtat burime. Është një rikthim në Durrës për Prognin, i cili edhe në të shkuarën ka qenë pjesë e bregdetarëve, duke shënuar dhe dy gola në 17 ndeshjet që u aktivizua.
Një lëvizje surprizë, pasi Progni ka pasur besimin e trajnerit Skënder Gega, me këtë të fundit që e kishte aktivizuar dhe në dy ndeshjet e para të edicionit të ri. Nuk do të jetë aspak çudi që për Prognin të rezervohen disa minuta që në takimin e së dielës ndaj skuadrës së Kamzës.
