Aris i Migjen Bashës dhe Mërgim Mavrajt, vazhdon ecurinë fantastike në këtë sezon të Superligës greke. Në ndeshjen e javës së pestë ndaj Asteras Tripolis, Arisi fitoi me shifrat 2-0, vetëm falë golave në minutat e fundit.
Sfida ishte e dominuar nga vendasit, teksa goditën disa herë kuadratin, por vetëm në minutën e 87-të, gjeti golin e parë me Junes, falë penalltisë, ndërkohë që në minutën e 93-të, Garsia shënoi edhe të dytin.
Migjen Basha luajti si titullar, për 90 minuta në qendër të mesfushës, ndërkohë që Mavraj edhe këtë takim, ishte në tribunë. Pas 5 javësh, Arisi qëndron në vendin e katërt, me 12 pikë në klasifikim.
