Sulmuesi i Barcelonës, Osman Dembele, ka shkaktuar polemika në Spanjë pas pëlqimit të një fotomontazhi të tij me fanellën e Liverpulit.
Në fakt, fotoja është momenti kur Vajnaldum feston golin e tij në përmbysjen e çmendur 4-0 ndaj Barcelonës në gjysmëfinalen e Champions-it sezonin e shkuar dhe ku duket edhe mbrojtësi i Liverpulit, Trent-Aleksander Arnold.
Fotoja e retushuar me imazhin e sulmuesit të Barcelonës në vend të kokës së mesfushorit holandez u postua nga një tifoz i Liverpulit dhe Dembele nuk ngurroi që ta pëlqente, duke shkaktuar edhe një valë të re spekulimesh për një transferim të mundshëm në “Anfield Road”.
Ish-talenti i Dortmundit, i cili nuk është ambientuar kurrë në “Camp Nou”, është përfolur shpesh për një largim nga Barcelona. Në Premier Ligë, Çelsi dhe Junajtid kanë qenë klubet e interesuara për francezin.
