Një pjesë e parë e mirë për skuadrën e Mezanit, me shumë raste të krijuara, edhe pse rrezikshmëria nuk ishte në nivelin e duhur. Nga krahu tjetër të besuarit e Bledi Shkëmbit luajtën të përqëndruar në mesfushë, duke u kujdesur më shumë të mos pësonin se sa të krijonin raste për shënim. Por nga ana tjetër, Luftëtari i etur për fitore dhe gola, arriti të bëhej i rrezikshëm, pasi me Vasil Shkurtaj në qendër të sulmit, i hapi jo pak probleme në pjesën e parë skuadrës gjirokastrite. Të parët që rrezikuan ishin durrsakët, ku Progni në minutën e 17` gjuan nga goditja e dënimit, një top që shkon direkt në portë, por është gardiani i gjirokastritëve, Ruçi aqi që bën heroin, duke e devijuar jashtë në goditje këndi.
Pas këtij momenti janë vendasit që marrin frenat e lojës në dorë dhe kërkojnë golin. Në minutën e 30-është Shkurtaj që ka një mundësi të shkëlqyer për të shënuar. Por topi i goditur prej tij shkon në duart e portierit Isli Hidi. Pak minuta më vonë është sërish Shkurtaj që gjuan drejt portës, por këtë herë portieri i durrsakëve nuk ka çfarë të bëj. Sulmuesi i Luftëtarit merr një top brenda zonës nga Radoviç. Gjuajtja e tij, pothuajse nga pika e penalltisë, shkon drejt e në portë, ku Hidi prek topin me dorë por pa mundur t`a devijojë jashtë. 1-0 për Luftëtarin, ndërsa në kraun tjetër mundohet të ruajnë qetësinë në minutat e mbetura të pjesës së parë, e cila do të mbyllej pikërisht me avantazhin e gjirokastritëve.
Pjesa e dytë nis rrezikshëm për Luftëtarin, që ka një mundësi të mirë shënimi në minutën e 48`, por dalja e Hidi i heq topin sulmit të gjirokastritëve, duke e dërguar topin në fundore. Në krahun tjetër Bledi Shkëmbi e nis me një zëvendësim në skuadrën e tij, ku në fushë hidhet Arsid Kruja që i zë vendin Traore Faye. Sakaq të besuarit e Mezanit vijojnë të sulmojnë, kur në minutën e 50`, sërish tentojnë portën por portieri Hidi largon jashtë zone topin.
Agresiv dhe shumë të saktë në zonën kundërshtare, futbollistët e Luftëtarit arrijnë të ushtrojnë presion dhe të korrin rezultate. Kështu në minutën e 59` është Rapo ai që shënon golin e dytë për Luftëtarin, me një të majtë spektakolare nga jashtë zone. Festimi i golit bëhet duke hequr fanellën, ndërkohë që gjyqtari Enea Jorgji i nxjerr kartonin e verdhë. Në minutën e 63` është Milosavljev që shënon edhe golin e tretë, me një të djathtë nga jashtë zone, duke i dhënë një goditje tjetër Teutës. Por durrsakët edhe pse duke humbur me rezultatin 3-0, në minutën e 75` fitojnë një penallti. Latif gjuan nga pika e bardhë dhe dërgon topin në rrjetë.
Ndonëse Teuta dha shenja reagimi në minutat e fundit të lojës, sërish e pati të pamundur të përmbys rezultatin. Me këto tre pikë, Luftëtari mbetet sërish në vendin e fundit në renditje me pikë të barabarta me Kastriotin, ndërsa Teuta mban vendin e pestë për momentin.