José Antonio Camacho është shkarkuar nga posti i tij si trajner i Gabonit, sipas disa mediave lokale, të cilave iu referohen mediat spanjolle. Gazeta “Gabon Media Time” njoftoi vendimin e federatës lokale për ta shkarkuar trajnerin e njohur spanjoll si rezultat i rezultateve të dobëta të “Panthers” në kohët e fundit.
Në fakt, Camacho si trajner i Gabonit ka marrë vetëm 2 fitore në 17 ndeshje të luajtura. Dy rezultatet e fundit të dobëta, një barazim kundër Burundit dhe një humbje kundër Malit, në fazën e kualifikimit për Kupën e Afrikës, kanë qenë shkaktari që Camacho të largohet nga posti.
Trajneri spanjoll, gjithashtu, nuk pati fat vitin e kaluar, kur e udhëhoqi Gabonin në Kupën e Afrikës si mikpritës i turneut, sepse nuk shkoi përtej fazës së parë. Në ditët e fundit, Camacho ishte bërë titull mediash për shkak të kritikave që kishte marrë nga ylli i tij, lojtari i Arsenalit, Aubameyang, për “mungesën e përfshirjes në ekipin kombëtar”.