Trajneri i Arsenal Unai Emery beson se Arsenal mund të përfitojë nga dorëheqja e Mesut Ozil nga angazhimet me ekipin përfaqësues të Gjermanisë pas kontestimeve të shumta që kritikët i rezervuan futbollistit në vendin e tij. 29-vjeçari Ozil u dorëhoq nga Gjermania si pasojë e performancës së tij të dobët në Kupën e Botës dhe stuhisë politike që e priti lojtarin në Gjermani, pas fotos së tij me Erdogan në Turqi. Një situatë shumë e vështirë për futbollistin, por prej të cilës trajneri i Arsenal, Emery, shpreson të përfitojë.
“Futbollistët kanë zakon të luajnë me përfaqësueset e tyre në ndeshje të rëndësishme, për të mbrojtur identitetin e tyre dhe kur një futbollist ndalon së bëri këtë gjë, unë mendoj se është një gjë shumë e mirë për ata që të fokusohen te skuadrat e tyre. Për Mesut dhe për mua gjithashtu është e rëndësishme, që ai është i fokusuar me ne çdo ditë, duke pushuar për tre ditë gjatë fundjavës. Mesut, ashtu si futbollistët e tjerë, punon shumë mirë këtu”, deklaroi trajneri i Arsenal, Emery.
