Antoine Griezmann është përjashtuar në mënyrën më të çuditshme nga Top 3 i FIFA “The Best”, çmim ky që akordohet nga organizmi më i lartë futbollistik në planet. Sikurse ndodhi në Montecarlo me rastin e futbollistit më të mirë të sezonit të kaluar të Champions League, tre finalistët janë Cristiano Ronaldo, Luka Modric dhe Mohamed Salah.
Një përjashtim që hap shumë debate, duke konsideruar sezonin madhështor dhe fantastik të realizuar nga sulmuesi francez, Antoine Griezmann, protagonist kryesor në suksesin e Atletico Madrid, për fitimin e trofeut Europa League dhe Super Kupës së Europës me kulmimin në muajin korrik kur me përfaqësuesen e Francës fitoi Kupën e Botës në Rusi. Dhe nuk janë vetëm tifozët ata që shprehin zhgënjimin dhe mosaprovim ndaj vendimit e zgjedhjes së FIFA-s. Në vijë të parë të sulmit kësaj here është vetë klubi në të cilin militon futbollisti francez. Në fakt, Atletico Madrid ka shprehur çudinë dhe kontestimin përmes një postimi në Tëitter: “Sin palabras” apo “Pa fjalë”, ishte komenti që shoqëron foton e Griezmann i rrethuar me tre trofetë madhorë të fituar gjatë sezonit të fundit.
