Fiorentina ka mundur 2-0 Atalanta-n në javën e shtatë të kampionatit italian të futbollit dhe është ngjitur në vendin e tretë të renditjes, duke zbritur Inter-in në të pestin, teksa i katërti mbahet nga Sassuolo, që sot në mbrëmje do të presë Milan-in.
Golat që kanë vendosur ndeshjen e luajtur në “Franchi” jan shënuar me penallti nga Veretout në minutën e 63-të dhe me goditje dënimi nga Biraghi në të 64-ën. Kjo ka qenë humbja e tretë në kampionat për zikaltrit, që nuk fitojnë prej gjashtë ndeshjes. Ata mbajnë vendin e 15-të me 6 pikë.
Ka fituar edhe Genoa, e cila ka mundur 2-1 Frosinone-n në transfertë falë dy golave të lojtarit të momentit në Itali, Krzystof Piatek, i cili konsiderohet si “Lewandowski i ri” në Poloni dhe që kryeson renditjen e golashënuesve të Serisë A me 8 realizime. Ai është bërë debutuesi i parë në kategorinë kryesore të futbollit italian që shënon të paktën 8 gola në 6 ndeshjet e para që nga koha e Karl Aage Hansen (Atalanta 1949/50).
Ndeshja e luajtur në Verona mes Chievo-s dhe Torino-s është fituar nga këta të fundit me rezultatin 1-0. Takimi është vendosur nga një gol i Zaza-s në minutën e 88-të.
Nërkohë, Bologna ka fituar 2-1 takimin e luajtur në shtëpi kundër Udinese-s në orën 12:30.