Eden Hazard nuk po ndalet së shënuari gola, e megjithatë tifozët e Chelsea-s janë të shqetësuar për një fakt: futbollisti ka ndryshuar mënyrën e tij të festuarit.
Belgu rrëshqiste me gjunjë në fund të fushës drejt tifozëve, por një gjë e tillë nuk ka ndodhur ditëve të fundit, dhe as në golin e shënuar pasditen e së shtunës kundër Liverpool. Për të mos u lënë vend keqkuptimeve, 27-vjeçari ka zgjedhur që t’i tregojë vetë motivet duke thënë se një festë e tillë ka sjellë pasoja negative tek gjunjët e tij.
“S’duhet ta bëja më një gjë të tillë. Gjunjët e mi janë “flakë”. Nuk do ketë më një festim të tillë”, u shpreh ai në një intervistë dhënë për kanalin zyrtar të klubit.
Hazard është shndërruar në një makinë golash këtë sezon. Ai u transferua në Londër në 2012 dhe numëron 213 ndeshjen me fanellën e “bluve” ku dhe ka shënuar plot 74 herë.