Trajneri i Barcelonës, Ernesto Valverde, foli për rëndësinë e Leo Messit në triumfin bindës ndaj PSV Eindhoven, në ndeshjen hapëse të Ligës së Kampionëve të këtij edicioni për të tijtë: “Gjërat që bën Messi në fushën e lojës janë të jashtëzakonshme, por tashmë duken normale për një futbollist si ai, sepse i shohim gjithmonë. Për cilindo prej nesh do të ishin anormale, por ai bën gjëra të jashtëzakonshme, që duken rutinë”.
Veç Leo Messit, një tjetër emër i shquar ishte ai i Ousmane Dembélé. Francezi shënoi një gol të madh dhe ishte shumë pjesëmarrës në lojë. Trajneri blaugrana ka këtë vlerësim për të: “Dembele është në një formë shumë të mirë. Kjo lidhet mirë me vazhdimësinë që ka me golin”.
Sa për ndeshjen, Valverde gjykon: “Loja ishte me kosto normale. Kundërshtari kishte lojtarë të shpejtë. Na çliroi goli i parë. Në pjesën e dytë e filluam më mirë, duke dominuar lojën, por me epërsinë 1-0 je seriozisht i rrezikuar. Pas golit të dytë ishim më të qetë”.
Lidhur me dëshirën e madhe të klubit dhe veçanërisht të Leo Messit për ta fituar këtë Champions, trajneri Valverde shtoi: “Më thoni kush nuk e dëshiron këtë trofe. Kush nuk luan maksimalisht i motivuar në Champons? Ne e dimë rëndësinë e secilit kompeticion, ku marrim pjesë. Në kampionat ka vend edhe për ndonjë hap fals, sepse mund të korrigjohesh rrugës. Në Champions, gabimet kushtojnë shtrenjtë. Eshtë e qartë se ne nuk mund të dështojmë”.
