Mesfushori i Arsenalit, Aaron Ramsey, është shumë afër largimit nga klubi londinez si transferim i lirë në fund të këtij sezoni, pasi që bisedimet për rinovim të kontratës mes tij dhe klubit kanë dështuar, raporton Daily Mail.
Kontrata aktuale e Ramseyt me Arsenalin përfundon në fund të këtij sezoni dhe sipas burimeve brenda klubit, për momentin nuk ka ofertë tjetër për rinovimin e kontratës së tij, pasi që bisedimet e fundit, që zgjatën disa muaj, rezultuan të pafrytshme, përcjell Gazeta Express.
Më herët ishte thënë se marrëveshja për rinovimin e kontratës kishte mbetur vetëm si formalitet, pasi që të dy palët ishin të interesuar për këtë gjë. Megjithatë, kjo tani rezulton të jetë e pavërtetë pasi që nuk ka qenë e mundur të arrihet marrëveshje për kontratën e re.
Ky lajm ka ngjallur interesim te disa klube angleze, si Chelsea dhe Manchester Unitedi, pasi që mund ta transferojë pa i paguar asnjë shumë Arsenalit. Ata mund ta transferojnë edhe në janar Ramseyn për një çmim të lirë.
