Ernesto Valverde do të bëjë rrotacion në formacionin e të tijve në “Anoeta”. Trajneri katalanas e konfirmoi këtë në një konferencë shtypi, pas trajnimit të fundit, para sfidës Real Sociedad-Barça. Ndërprerja e kampionatit për shkak të ndeshjeve të kombëtareve e detyrojnë trajnerin të bëjë ndryshime në lidhje me 11-shen teorike.
“Sigurisht, kam parasysh pushimin për shkak të angazhimeve të kombëtareve, kur them se do të bëjmë rrotacion. Ndryshe i bie që të kemi një lojë në tri ditë, sepse ka lojtarë që vijnë nga larg dhe disa kanë luajtur dy ndeshje me kombëtaret e tyre. Nuk mund ta evitoj rrotacionin, natyrisht”, – pohoi “Txingurri”.
Në këtë aspekt, gjithashtu, Valverde komentoi faktin se ndërkombëtarët e tij të deridjeshëm, si Jordi Alba, Pique dhe Messi, janë stërvitur me klubin dhe jo gjë e ndihmon: “Këta lojtarë me peshë në ekipin tonë kanë pasur më shumë mundësi për të pushuar. Në këtë kuptim jemi më të mirë, nuk mund ta mohoj”.
Në mesin e këtyre emrave qëndron edhe Leo Messi, për të cilin trajneri i skuadrës katalanase shprehet: “Gjithmonë llogaris më të mirën e tij, aq më tepër kur është i freskët fizikisht. Nëse Leo është i freskët, i rikuperuar dhe me më shumë hapësirë për të pushuar, atëherë padyshim kjo është më e mira për të gjithë”.
Ekzistojnë shumë faktorë, që Valverde merr parasysh kur paralajmëron rrotacion. Ai llogarit jo vetëm të kaluarën, si pushim, por edhe të ardhmen, shtatë ndeshjet që e presin Barcelonën në 23 ditët e ardhshme: “Është e qartë që ne duhet të kemi lojtarë të gatshëm jo vetëm për një ndeshje, por shumë më tepër, në disa ditë. Prandaj duhet të bëjmë rrotacion, për të shmangur lëndimet e lojtarëve dhe të jemi sa më të freskët”.
Trajneri e kupton se ka qenë historikisht një betejë e vështirë për Barcelonën, që të luajë në “Anoeta”, referuar edhe rezultateve të marra atje në vitet e fundit: “Ne duhet të kemi një fillim të mirë, sepse e dimë se si ekipet rivale na presin, sidomos kur luajnë në fushën e tyre. Ne e dimë se si karikohen kur luajnë ndaj Barcelonës, e njohim nivelin e presionit që na vënë. Real Sociedad dhe publiku vendës do të shtyjë më shumë, ndaj ka shumë rëndësi të tregohemi të përqendruar dhe të fortë”.