Marcos Alonso debutoi me Spanjën kundër Argjentinës më 27 mars, në “Metropolitan Wanda”, nën drejtimin e Julen Lopetegui. Që atëherë, lojtari i Chelsea nuk u kthye me ekipin kombëtar. Tashmë është në krye të listës së Luis Enrique dhe shpjegohet për “Onda Cero” se si nuk qe pjesë e Kupës së Botës . Ai foli edhe për ndjenjat që ka me trajner të ri, karrierën e tij te Chelsea, klub ku ndihet shumë i lumtur.
A i mungon Spanja: “Ditën kur të largohem nga futbolli do të kthehem në Spanjë, por tani kam tri vite te Chelsea dhe jam shumë i lumtur atje”.
Ftesa e kombëtares: “Kam dëgjuar për ftesën e Luis Enrique kur isha në trajnim me Chelsea. Natyrisht, jam shumë i lumtur që jam këtu, me kombëtaren e Spanjës”.
I lumtur te Chelsea: “Në Angli ndihem mjaft mirë. Futbolli përjetohet ndryshe atje. Stadiumet janë plot e përplot jo vetëm me tifozët e Chelsea, por edhe të ekipeve të tjera”.
Dy fjalë për Lopetegui: “Nuk mendoj se ka pasur ndonjë gjë prapa mosthirrjes sime në kombëtare. Ishte një vendim i Lopetegui dhe stafit të tij stërvitor, nuk dua ta shoh ndryshe”.
Situata me Hazard: “Unë nuk e shoh Hazard te Real Madridi. Ai është shumë i lumtur te Chelsea. Nuk e di nëse ka pasur interes apo jo, por Hazard dhe familja e tij janë mjaft mirë në Londër”.
Mungesa në Ligën e Kampionëve: “E vërteta është se na dhemb fakti i mospjesëmarrjes në Ligën e Kampionëve këtë edicion. Unë mendoj se sezonin e kaluar kemi merituar më shumë. Mbetet për të parë nëse ky “kursim energjish” do të na ndihmojë për të fituar Premier League”.
