Ronaldo, 33 vjeç, kundërshton me forcë pretendimet se e ka sulmuar zonjën Mayorga, pasi e ka ftuar atë për t’u zhytur në “xhakuzi”. Paparacët dhe një video e shpërndarë treguan Ronaldon, asokohe 24 vjeç, dhe zonjushën Mayorga, asokohe 25 vjeçe, duke kërcyer së bashku në klubin e natës, të mbyllur tani, në afërsi të “Palms Place”, para sulmit seksual të supozuar.
Akuzat ndaj yllit portugez pretendojnë se zonja Mayorga bërtiti “jo, jo, jo”, pasi futbollisti i shquar e detyroi të kryente marrëdhënie seksuale në këtë suitë luksoze. Sipas dokumenteve ligjore, ai më pas kërkoi falje, duke i thënë modeles amerikane se “e teproi, ndërsa zakonisht është një zotëri”.
Avokatët e zonjës Mayorga, aktualisht 34 vjeçe, thonë se ajo ishte paguar me një shumë prej 288 mijë paundësh vitin e ardhshëm nga pesë herë fituesi i “Topit të Artë”, duke ia mbyllur gojën që të përsëriste pretendimet për përdhunim. Ish-ylli i Manchester United dhe Real Madridit mohon çdolloj keqbërje të tij ndaj zonjës në fjalë.
Ai tha të mërkurën: “Unë i mohoj fuqishëm akuzat që po bëhen kundër meje. Përdhunimi është një krim i neveritshëm, që shkon kundër çdo gjëje, për të cilën jam dhe besoj. I etur, siç mund të jem unë, për të pastruar emrin tim, refuzoj të ushqej spektaklin e krijuar nga njerëz që kërkojnë të promovojnë veten e tyre përmes emrit tim. Ndërgjegjia ime e pastër do të më lejojë të pres me qetësi rezultatet e çdo hetimi”.
Ylli portugez i kishte mohuar më parë akuzat për përdhunim të zonjës Mayorga, duke i konsideruar si “fake news”. Përmes një videoje në Instagram, CR7 ka sqaruar: “Ata duan të bëhen të famshëm duke përdorur emrin tim”. Departamenti i Policisë Metropolitane në Las Vegas konfirmoi më parë, këtë javë, se e kishte rihapur hetimin për këtë akuzë përdhunimi, e cila i referohet vitit 2009 dhe ka të bëjë me Cristiano Ronaldon.
Mbrëmjen e kaluar, avokati i Mayorga tha se ajo ka mbetur e traumatizuar, vuan nga depresioni dhe mendimet vetëvrasëse që nga momenti i përdhunimit të pretenduar. Zonja Mayorga pretendon se Ronaldo i dha asaj një bluzë dhe pantallona të shkurtra dhe e ftoi të kryente aktin seksual. Ajo shton se portugezi e tërhoqi në një nga dhomat e gjumit, e hodhi në shtrat dhe u përpoq të përfshiheshin në marrëdhënie seksuale.
Partnerët më të mëdhenj të sponsorizimit të Ronaldos, “Nike” dhe “EA Sports” thyen heshtjen e tyre mbrëmë, duke deklaruar shqetësimin e tyre lidhur me akuzat. “Nike” tha se ishte “thellësisht i shqetësuar”, ndërsa gjiganti i lojrave “EA Sports” shtoi: “Ne e kemi parë raportin në lidhje me këto akuza kundër Cristiano Ronaldos. Jemi duke monitoruar nga afër situatën…”