Kombëtarja e Shpresave e drejtuar nga trajneri Alban Bushi do të nisë shumë shpejt punën për ndeshjet e radhës eliminatore të kampionatit europian për këtë grupmoshë. Tekniku kuqezi ka menduar dhe emrat që do të thërrasë. Në listën e përpiluar nga numri një i stolit kanë filluar të zbulohen dhe lojtarët e parë që do të përfaqësojnë Shqipërinë kundër Italisë më 11 tetor dhe transfertën e Estonisë më 16 tetor.
Një ndër prurjet e reja është Omar Imeri. Për herë të parë do të veshë fanellën kuqezi. Ai ka pranuar ftesën nga trajneri Bushi për dy ndeshjet e radhës. 18-vjeçari luan me Shkëndijen e Tetovës dhe ka fituar vëmendjen e kombëtares tonë. Mesfushori nuk e ka për herë të parë përfaqësimin me kombëtaren, pasi më heret ka luajtur dhe për Maqedoninë. Afrimi i tij është shumë i vlefshëm, pasi fitojmë një tjetër element me vlera.
Imeri ka luajtur 23 minuta me Maqedoninë U-21 në ndeshjen kundër Austrisë, të humbur me rezultatin 2-0. Këtë sezon ka nisur të gjejë minuta dhe me kampionët e Maqedonisë, Shkëndijen, pasi ka luajtur 4 ndeshje si titullar duke koleksionuar 222 minuta. Shkëndija ka lajmëruar vetë përmes faqes zyrtare kalimin e Omerit në radhët e Shqipërisë. Një krenari kjo dhe për shqiptarët e Maqedonisë!
