Kilië Mbape ishte heroi i PSG-së në ndeshjen kundër Marsejës edhe për përpara ndeshjes situata që kaloi nuk ishte aspak e këndshme. Ai e nisi nga stoli ndeshjen bashkë me mbrojtësin Rabio. Arsyeja? Sepse kishin shkuar me vonesë në stërvitjen përpara ndeshjes dhe diçka të tillë trajneri Tuhel nuk e toleroi.
Pavarësisht se ai është ylli skuadrës dhe një element i pazëvendësueshëm, trajneri gjerman e uli në stol dhe e futi në pjesën e dytë. Mbape shënoi golin e parë të ndeshjes, ndërsa Draksler vulosi triumfin në minutat shtesë.
BUFON E KËSHILLON- E bënte shpesh te Juventusi, por edhe te kombëtarja italiane. Mosha që ka mbi shpatulla e detyron që të sillet si një lider edhe te PSGja, pavarësisht se ky është sezoni i tij i parë në Francë.
Xhanluixhi Bufon e ka kritikuar Mbapenë përpara ndeshjes për vonesën e tij dhe i ka thënë se kjo nuk është rruga e duhur për t’u bërë një kampion i madh. Madje, kamerat kanë kapur momentin teksa Xhixhi i jep një shuplakë, e cila ishte në formën e shakasë. Bufon ka thënë gjithmonë fjalë të mira për Mbapenë.
