Sulmuesi turk, Cengiz Under po zhvillon një fillim perfekt të sezonit me skuadrën e Romës në Seria A dhe në Champions League. Sulmuesi i djathtë po ndërton mbi suksesin dhe eksperiencën e grumbulluar nga sezoni i parë i përjetuar në Itali, dhe forma e tij shumë e mirë po tërheq interesimin e disa prej klubeve më elitare në Europë. Referuar raportimeve të “SportBild”, Bayern Munich ka përzgjedhur zëvendësuesin e holandezit veteran, Arjen Robben. Media gjermane zbulon se emri i preferuar te bavarezët është në fakt ai i Under, të cilin klubi nga Munih po e ndjek prej kohësh me vëmendje të madhe. Kampionët e Gjermanisë raportohet të jenë gati të ofrojnë rreth 60 milionë euro për të siguruar shërbimet e turkut të Romës.
Deri tani Under ka shënuar 2 gola dhe ka shërbyer 4 asiste në 7 ndeshje për klubin nga kryeqyteti. Sezonin e kaluar turku arriti totalin e 8 golave në të gjitha kompeticionet, duke i shënuar që të gjithë golat në gjysmën e dytë të sezonit, pasi në fazën e parë hasi vështirësi të përshtatej. Under tashmë është edhe futbollist i përfaqësueses së Turqisë. Që nga koha kur ka debutuar me kombëtaren turke në vitin 2016, në moshën 19 vjeçare, ai ka regjistruar 13 ndeshje të luajtura, duke shënuar 4 gola për vendin e tij.
