Axel Witsel është rikthyer në futbollin elitar pas një viti e gjysmë të kaluar në Kinë me skuadrën e Tianjin Quanjian. Tashmë pjesë e Borussia Dortmund, mesfushori i datëlindjes 1989, i konsideruar pak ditë më parë si blerja më mirë e merkatos së verës nga trajneri i Belgjikës, Roberto Martinez, ka folur për “Der Westen”.
Në intervistën e tij, Witsel ka rrëfyer sërish tratativën e vitit 2016, që mund ta kishte transferuar futbollistin belg në Seria A, për të veshur fanellën e Juventus. Një tratativë e dështuar vetëm në fazën finale të asaj merkato. “Kam fluturuar për në Torino me qëllim që të nënshkruaja kontratën me Juventus. Ishte kryer gjithçka dhe ishte edhe dita e fundit e merkatos. Më pas më telefonuan nga skuadra e Zenit dhe më thanë të kthehesha në Rusi sepse marrëveshja ishte prishur. Pjesa tjetër është histori”.