Përfaqësuesja e Shqipërisë vijon të vuajë nga sindroma e të pësuarit të golave në minutat e fundit, edhe kur bëhet fjalë për ekipin Shpresa të Shqipërisë. Ka ndodhur pikërisht kështu edhe mbrëmjen e të enjtes, kur përfaqësuesja U-21 e Shqipërisë është mundur në “Selman Stërmasi” me rezultatin 0-1 nga bashkëmoshatarët nga Spanja, me golin e vetëm të takimit të shënuar në minutën e 84’ nga Mir.
Kuqezinjtë mbyllën kështu me humbje ndeshjen e parafundit në këto kualifikuese të Europianit për U-21 që do të zhvillohet në Itali. Pas kësaj humbje Shqipëria vijon të renditet në vend të parafundit të klasifikimit, me vetëm 6 pikë në 9 ndeshje, duke lënë pas vetëm Estoninë me 1 pikë në 8 takime. Nga ana tjetër, përfaqësuesja e Spanjës U-21, që kishte siguruar kualifikimit dhe biletën për në Itali, renditet në vend të parë e pashqetësuar në kuotën e 24 pikëve.
Shqipëria me fat, por edhe me kontributin e madh të portierit Kastrati ka mundur të ndalë iberikët për më shumë se 80 minuta, por shtyllat dhe duart e gardianit nuk kanë mundur dot të ruajnë rrjetën deri në vërshllimën e fundit. Kur kishin mbetur vetëm 6 minuta deri në përfundim të kohës së rregullt, Rafa Mir ka shënuar dhe ka kaluar Spanjën në avantazh.