Krzysztof Piatek ka qenë një nga zbulimet e Serie A për këtë sezon. Sulmuesi polak ka tërhequr vëmendjen me paraqitjet e tij te Genoa, ashtu si edhe te kombëtarja polake në Nations League, dhe për këtë arsye pritet të vijnë një lumë ofertash nga skuadrat që duan të marrin shërbimet e tij.
Sipas “Daily Mirror”, Chelsea i është bashkuar ankandit që ka nisur për sulmuesin 23-vjeçar. Piatek ka mahnitur botën e futbollit me golat e tij dhe tani duket se “Blutë” janë të gatshëm të sfidojnë Barcelona-n dhe Napoli-n, gjithashtu të interesuar për lojtarin.
Sipas të përditshmes angleze, Piatek është një nga lojtarët e kërkuar nga Maurizio Sarri në merkaton e janarit. Polaku është një alternativë e Mauro Icardit, i cili praktikisht është i paarritshëm.
Por nuk do të jetë e lehtë për Chelsean, Barcelonan dhe Napolin për të siguruar shërbimet e tij. Genoa tashmë ka marrë oferta prej rreth 50 milionë eurosh për Piatek, çmimi i të cilit mund të rritet.
