Izraeli u mposht mbrëmjen e djeshme nga Skocia me rezultatin 3-2 në takimin e vlefshëm për Grupin 1 të Ligës së Kombëve, ku bënte pjesë edhe Shqipëria.
Falë triumfit në ndeshjen e fundit, kombëtarja britanike arriti të siguronte vendin e parë duke u kualifikuar për në raundin gjysmëfinal.
Pavarësisht humbjes së djeshme, futbollistët izraelit kanë fituar simpatinë e të gjithë tifozëve, teksa në momentin e ekzekutimit të himneve respektive, disa prej lojtarëve të kombëtares izraelite kanë hequr xhaketat e tyre dhe ua kanë veshur fëmijëve të vegjël që po i shoqëronin të cilët po ngrinin së ftohti në stadiumin “Hapden Park”.
Ky moment nuk i shpëtoi kamerave, teksa videoja është shpërndarë me shpejtësi në rrjetet sociale, ku nuk kanë munguar komentet pozitive.
