Suksesi ndaj Kaljarit sot ka konfirmuar jo vetëm hegjemoninë e Juventusit në këtë edicion në Serinë A, por edhe se si skuadra aktuale është një nga më të mirat në historinë e klubit bardhezi.
Ekipi i drejtuar nga Masimiliano Alegri ka arritur të regjistrojë 31 pikë në 11 ndeshje dhe kjo bën të thyhet një rekord absolut pikësh nga skuadra italiane sa i përket ecurisë së deritanishme në kampionat. Rekordi i mëparshëm ishte ai i Juventusit të Kapelos, i cili kishte regjistruar 30 pikë pas 11 ndeshjeve të para në sezonin 2005-2006.
Bardhezinjtë mbyllën atë sezon me titullin kampion, por në fund u detyruan jo vetëm të dorëzonin titullin, por edhe të binin në Serinë B, si pasojë e procesit “Calciopoli”. Për shumë tifozë të bardhezinjve, ai ka qenë Juventusi më i fortë i të gjitha kohëve, por me sa duket ky aktual i Kristiano Ronaldos, po ecën më një marsh më shumë.
