Ashtu si edhe sezonet e tjera, edhe këtë vit do të luhet Kupa e Pavarësisë, që më parë është luajtur në Vlorë apo Tiranë. Ashtu si vjet, edhe këtë radhë do të jetë Korça vendi që do të presë Kupën e Republikës dhe është vetë FSHF, ajo e cila e njofton këtë gjë.
Megjithatë, FSHF duket se nuk e ka mësuar mirë në gjeografi që Korça i përket juglindjes së Shqipërisë, pasi në njoftim shkruhet: “Kupa “Pavarësia 2018″, do të zhvillohet në qytetin e Korçës. FSHF, Për të dytin vit radhazi, ka zgjedhur qytetin verilindor për të zhvilluar këtë aktivitet.
Me këtë logjikë të FSHF-së i bie që Kupa e Pavarësisë të luhet në Kukës dhe rrjedhimisht, edhe klubi i Skënderbeut është i Kukësit.
Ja njoftimi i plotë:
“Kupa “Pavarësia 2018″, do të zhvillohet në qytetin e Korcës. Federata Shqiptare e Futbollit, organizatorja e këtij turneu mbarëkombëtar, për të dytin vit radhazi ka zgjedhur qytetin verilindor për të zhvilluar këtë aktivitet. Pjesëmarrës do të jene katër skuadra: Otranto e Ulqinit, Struga nga Maqedonia, 2 Korriku nga Prishtina dhe Skënderbeu i Korçës. Shorti gjysmëfinal do të hidhet më datë 27 nëntor. Ndeshjet do te luhen më datë 28 nëntor në aneksin dhe stadiumin Skënderbeu. Aktiviteti fillon ne orën 11.00”, shkruhej në njoftim.
