Po të ishte një film do të titullohej “Në kërkim të lumturisë”. Aktori protagonist do të ishte Lucas Moura. Personazhi negativ? Unai Emery! Nga janari i 2013-ës deri tek ai i 2018-ës, jeta e brazilianit në Paris ka patur shumë ulje-ngritje: në fillim ka ardhur përshtatja me futbollin europian pas shpërthimit te Sao Paulo, më pas koleksionimi i trofeve (katër tituj në Ligue 1, katër Kupa të Ligës dhe tre Kupa të Francës) dhe, në fund, errësira totale.
Faji i blerjeve të Neymar dhe Mbappe? Ndoshta, por braziliani, i rilindur te Tottenham-i i Pochettino-s, nuk e ka drejtuar gishtin nga konkurrenca që ka patur në muajt e fundit në Francë, por nga ai që e ka lënë në harresë pa asnjë shpjegim: trajneri Unai Emery!
Këtë të diel, Tottenham-i do të ndeshet me Arsenal-in dhe askush nuk mund të jetë më i lumtur se Lucas Moura. Siç ka raportuar “Mirror”, braziliani ka shpjeguar për ESPN Brazil se ka jetuar një ferr të vërtetë te PSG nën drejtimin e trajnerit aktual të “Topçinjve”:
“Dua t’i harroj sa më shpejt muajt e fundit në Francë. Kanë qenë më të vështirët e jetës sime. Preferoj të kujtoj katër vitet gjatë të cilëve kam qenë i lumtur në Paris, kur kam fituar disa trofe. Viti i fundit më ka shërbyer për të mësuar dhe për t’u rritur. Tani jam më i fortë”, ka thënë Moura.
Braziliani pret me padurim të marrë revanshin e tij ndaj ish-trajnerit në derbin e Londrës: “Te PSG nuk më ka dhënë një shpjegim për lënien jashtë formacionit. Por unë nuk dua të shoh mbrapa, dua të mendoj për të ardhmen dhe të fitoj këtu”.
E kaluara me Emery nuk është e lehtë për t’u harruar, por e tashmja me Pochettino-n te Tottenham nuk mund të ishte më e mirë. Dhe Moura nuk do ta ndërronte skuadrën e tij të re me asgjë në botë: “Këtu jam i lumtur. Besoj te ky klub dhe mendoj se mund të fitojmë titullin në Premier League. Detyra jonë është të punojmë dhe të kemi gjithmonë besim”.
Një ekip i madh që drejtohet nga një trajner i cili i bën të gjithë të ndihen të rëndësishëm, por jo vetëm: “Këtu ka lojtarë të mëdhenj”. Një mesazh për Mbappe dhe Neymar? Mes rreshtave ndoshta… në pritje për t’i sfiduar ish-shokët e ekipit në Europë. Ndërkohë, hakmarrja ndaj Emery mund të vijë këtë fundjavë para publikut të “Emirates Stadium”.