Milan-Dudelange mbulohet nga misteri. Pas frikës së madhe kuqezinjtë kanë kompletuar përmbysjen dhe kanë fituar 5-2. Një nga protagonistët e takimit ka qenë Patrick Cutrone, autor i dy golave, madje jo, i një goli të vetëm, jo janë dy.
Akoma nuk kuptohet nëse goli i barazimit të përkohshëm 2-2 është realizuar nga Cutrone apo ka qenë një autogol i Stelvio Cruz, mbrojtësi i Dudelange.
Në fillim është dhënë si autogol, por UEFA është korrigjuar dhe ia ka dhënë golin numrit 63 të kuqezinjve. Imazhet nuk ndihmojnë të sqarojnë atë që ka ndodhur, por duket se sulmuesi i Milan nuk e prek topin, siç ka pranuar edhe vetë pas ndeshjes.
“Duhet të jem i ndershëm, nuk e kam prekur topin, – ka thënë ai duke qeshur. – Goli i dytë nuk është i imi, nuk e preka”.
