Situata absurde që krijoi me gjyqtarin e ndeshjes Kukësi-Flamurtari, ka shtyrë FSHF-në që të mos publikojë emrat e gjyqtarëve për ndeshjet e mbetura të javës së 11 të Superiores. Institucioni i futbollit kishte vendosur Blerim Zirin si kryesor në ndeshjen që u luajt në Kamzë, duke anashkaluar faktin se gjyqtari ishte kushëri me një nga drejtuesit e Kukësit.
FSHF u përball me kontestimet e klubit të Flamurtarit i cili me të drejtë kërkonte ndryshimin e Zirit për konflikt të hapur interesi pasi kishte lidhje farefisnore me Ramadan Ndreun. Ndaj nga Sektori i Gjykimit u vendos që të ndryshohej ai dhe ndeshjen e fituar 2-1 nga Flamurtari e drejtoi Olsi Sokoli.
Për të evituar ngjarje të ngjashme me gjyqtarë që kontestohen nga palët që një ditë para ndeshjeve duke i detyruar t’i ndryshojë, FSHF ka vendosur që të mos bëjë publike si zakonisht në faqen e saj në internet emrat e caktuar për ndeshjet e të shtunës. Kësisoj, për tre takimet e mbetura nga kjo javë, në faqen e FSHF-së gjen vetëm emrat e atyre që janë delegatët ose vëzhguesit e caktuar për të ndjekur mbarëvajtjen e takimit.
