Barcelona i ka kthyer përgjigje në mënyrë indirekte legjendës braziliane të futbollit, Peles, i cili e kishte kritikuar Messin duke thënë se ai e ka vetëm një aftësi. Klubi e ka treguar mbështetjen për argjentinasin përmes një video të publikuar në llogarinë në Twitter.
Braziliani 78-vjeçar e kishte kritikuar Messin duke thënë se ky i fundit nuk duhet të konsiderohet me të dhe Diego Maradonën, pasi që e ka vetëm një aftësi dhe varet më shumë se që duhet nga këmba e tij e majtë.
Para ndeshjes kundër Espanyolit, faqja zyrtare e Barcelonës në Twitter e postoi një video të kapitenit të skuadrës duke shënuar disa gola radhazi nga jashtë zonës së portierit. Mbi video, ata shkruan: “Ai e ka vetëm një aftësi”, duke ironizuar me komentet e Peles.
Pele kishte sugjeruar se 31-vjeçari e ka vetëm një aftësi dhe ai varet shumë nga këmba e tij e majtë e për këtë arsye nuk mund të krahasonit me legjendat e tjera të futbollit.
“Si mund ta krahasoni një njeri që luajti mirë me kokë, gjuante me këmbën e majtë, me këmbën e djathtë me dikë që luan vetëm me një këmbë, e ka vetën një aftësi dhe nuk gjuan mirë me kokë”, ka thënë Pele, i cili i ka shënuar më shumë se 1 mijë gola në karrierën e tij.
“Si mund ta bëni këtë krahasim? Për t’u krahasuar me Pelen, duhet të jetë dikush që gjuan mirë me këmbën e majtë, me këmbën e djathtë dhe me kokë. Maradona ishte një ndër lojtarët më të mirë. Nëse më pyetni se a ishte më i mirë se Messi, përgjigja ime është që po, ishte shumë më i mirë se Messi”.
Messi ende nuk i ka komentuar këto deklarata të ish-futbollistit pasi që ai preferon të mos flasë për media përveç në rastet kur bëhet fjalë vetëm për përgjegjësitë e tij si futbollist.
