UEFA dhe Milan do të përballen sërish në gjykatë, pasi kuqezinjtë i janë drejtuar sërish CAS-it të Lozanës pas vendimit që UEFA mori për të dënuar kuqezinjtë për shkak të “fair play financiar”. Administratori i deleguar Leonardo, ka shpjeguar se cila ka qenë arsyeja që kuqezinjtë do të përballen me UEFA në CAS (Gjykata e Arbitrazhit Sportiv), për të dytën herë brenda pak muajsh.
“Kemi marrë një letër nga ana e UEFA në lidhje me blerjen e Paqueta, në tetor. Ata e kundërshtojnë totalisht këtë blerje. Na kanë pyetur se përse e kemi blerë Paqueta, që nuk duhej ta kishim blerë lojtarin brazilian dhe e kundërshtojnë këtë blerje. Kjo na e bëri të vështirë të lëvizim në merkato, ndaj iu drejtuam CAS-it”, tha Leonardo.
“Ne iu drejtuam CAS për të refuzuar vendimin e UEFA në lidhje me shkeljen e “fair play financiar”. Ne do të vazhdojmë këtë betejë deri në barazimin e bilancit, në vitin 2021. Në CAS do të shpjegojmë shumë gjëra, ku edhe UEFA do të kuptojë shumë gjëra. Nuk mund të ekzistojnë rregulla të njëjta me ekipet e Premier League, një kampionat që prodhon 5 herë më shumë të ardhura se sa Seria A”, tha Leonardo.
